Skuadra e FC Shkupit ka shënuar fitore të lartë në ndeshjen e parë të balotazhit që e ka luajtur ndaj ekipit të Ligës së Dytë Novaci për të mbetur edhe sezonin e ardhshëm në Ligën e Parë të Maqedonisë.
Me një dominim total dhe me shumë raste për gol skuadra e Shkupit ka treguar se me pak fat sportive nuk do të duhej të luajë balotazhin. Skuadra e Ardian Nuhiut për vetëm 16-të minuta tregoi se Novaci nuk ka se çka të kërkon në këtë përballe.
Serinë e golave e hapi Ermedin Adem në minutën e 11-të, që më pas mysafirët të jenë në shok pas golit që shënoi Muharem Bajrami. Minuta e 31 ishte edhe një goditje tjetër e shpejtë dhe e fortë e Shkupit. Bunjamin Shabani asistoi për Emmanuel Mbellan, i cili nga një distancë prej më shumë se 30 metrave shënoi golin e tretë. Me këtë rezultat edhe u shkua në pushim.
Në pjesën e dytë përsëri Shkupi dominoi lojën, por nga një pakujdesi në mbrojtje Kalevski arriti që të zbut epërsinë në 3:1. Por që gjithçka të jetë në stilin e ish-kampionit të Maqedonisë dhe fituesit të kupës së Maqedonisë, Shkupit, Fatmir Arfii shënoi golin e katërt për rezultat përfundimtar, që mundë të thuhet i ka dhënë Shkupit epërsi të madhe dhe pothuajse gati është mbijetesa në elitën e më të mirëve.
Ndeshja e dytë në mes Novacit dhe Shkupit luhet të mërkurën në Shtip, me fillim në orën 17:00.
