Erion Shuku është përforcimi i rradhës i skuadrës sonë i cili është prezantuar gjatë ditës së sotme. Ai rikthehet te Shkupi pas dy viteve, ndërsa në intervistën për faqen zyrtare të klubit, mes tjerash është shprehur që gjithmonë ka ëndrruar të kthehet në shtëpi. Gjithashtu, ka apeluar që Shvercerat të vazhdojnë të janë lojtari numër 12 i ekipit, me shpresë që ai dhe shokët të mos i zhgënjejnë ata. Në vazhdim, intervista me Erion Shukun.
Impresionet pas rikthimit në shtëpi?
“Përshtypjet e para pas rikthimit në shtëpi janë të mrekullueshme, ashtu edhe siç kam pritur. Jam shumë i kënaqur nga pritja që më është bërë nga kryesia e klubit, më pas nga stafi teknik dhe gjithë të punësuarit në klub, duke përfshirë edhe lojtarët.”
Çka do të thot për ty të veshësh sërish fanellën e Shkupit?
“Si lojtar që ka dal nga akademia e klubit, jam shumë i lumtur që do ta vesh përsëri këtë fanellë, mirëpo njëkohësisht, ndjejë edhe përgjegjësi shumë të madhe!”
Mësimet më të rëndësishme që ke marrë nga eksperiencat me ekipet tjera?
“Ekipet tjera më kanë ndihmuar shumë për të fituar përvojë dhe të rritem si futbollist.”
Të ka munguar Shkupi gjatë kësaj periudhe?
“Pa dyshim! Në çdo ekip ku kam luajtur, gjithmonë kam ëndrruar të kthehem një ditë në shtëpi.”
Sa mendon se ka ndryshuar loja yte që nga koha kur ke debutuar për Shkupin si 17-vjeçar?
“Sigurisht, loja ime tani ka ndryshuar shumë dhe besoj se për të mirë. Me eksperiencën që kam marr te ekipet e mëparshme dhe me punën e trajnerëve nëpër këto skuadra, besoj se kam fituar mjaft përvojë.”
Për fund, ndonjë mesazh për Shvercerat?
“Pasi edhe vet jam rritur në frymën e Shvercerave, tifo grupit më të mirë në botë, i ftoj ata të janë numri 12 i ekipit në ndeshjet tona, në numër sa më të madh. Shpresoj se nuk do t`i zhgënjejmë.”
