Erion Shuku, një talent premtues i futbollit dhe produkt i akademisë së klubit, ka bërë rikthimin e tij te Shkupi, një lëvizje që shfaq përkushtimin për përforcimin e ekipit, por edhe besimin në lojtarët e rinj, produkt i akademisë sonë. Shuku, i cili si 17 vjeçar ishte pjesë e ekipit kampion në vitin 2022, ka treguar aftësitë e tij dhe ka bërë përvojë të vlefshme duke luajtur vitet e fundit në ekipe të ndryshme të ligës së dytë.
Erioni, është rritur duke njohur mirë filozofinë e klubit që nga koha kur ishte fëmijë. Ai, sjell me vete jo vetëm përvojën e fituar në ekipe të ndryshme si Slloga Vinica, Arsimi dhe Skopje, por edhe një lidhje të thellë me vlerat dhe kulturën e klubit. Përkushtimi i kryesisë së re për të forcuar ekipin përmes lojtarëve që kuptojnë mirë identitetin e klubit, është një strategji që mund të ndihmojë në arritjen e objektivave afatgjata të Shkupit.
Me rikthimin e Shukut, FC Shkupi edhe një herë ka konfirmuar se puna me të rinjtë është një nga prioritetet kryesore, duke synuar të zhvillojë futbollistë që jo vetëm do të forcojnë skuadrën, por edhe do të bëhen ambasadorë të sukseseve të ardhshme të klubit.
“Jemi shumë të kënaqur që Erioni rikthehet në familjen e FC Shkupit. Ai ka treguar potencial dhe ka një të ardhme të ndritur para tij. Angazhimi ynë në zhvillimin e futbollistëve të rinj është i palëkundur dhe ne do të vazhdojmë të mbështesim akademinë tonë vazhdimisht”, kanë deklaruar pas nënshkrimit të kontratës me Shukun, drejtori sportiv Nderim Nexhipi dhe CEO i klubit Ajkut Turan.
Kujtojmë që Erion Shuku, vetëm si 17 vjeçar, verën e vitit 2021, kishte debutuar për skuadrën tonë në kupat evropiane, duke lujatur 13 minuta në ndeshjen e xhiros së dytë eliminatore të Conference League, kundër Santa Clara nga Portugalia, ndërsa ai tashmë ka filluar të ushtroj bashkë me grupin, nën prirjen e trajnerit Alparslan Erdem dhe nesër bashkë me ekipin, do të udhëtoj për në Antali të Turqisë, ku skuadra do të përgatitet deri më tetë shkurt.
