Ekipi ka mbyllur me sukses ndeshjen kontrolluese ndaj Vardar Forinës në Gostivar, duke triumfuar me rezultat të thellë 5:2. Bardhebluve iu mjaftuan vetëm 45 minutat e para të takimit për të mbyllur gjithçka në favor të tyre, duke shënuar plotë 5 gola në rrjetën kundërshtare.
Muharem Bajrami zhbllokoi shifrat e këtij takimit, duke realizuar nga penalltia, që më pas të shënojnë Lamine Diack, Filip Stojanovski dhe dy herë rrjetë e gjeti Fatjon Jusufi.
Në përgjithësi ekipi tregoi formë të mirë dhe kishte lojë njëpërqind dominuese, ndërsa trajneri Qatip Osmani pati mundësinë t’i provojë të gjithë futbollistët, ku kishin mundësi të luajnë edhe lojtarët që kanë më pasur më pak hapësira në kampionat dhe Kupë.
Pas pauzës ndërkombëtare, FC Shkupi ndeshjen e radhës në kampionat të vlefshme për xhiron e 15-të do ta luajë si mysafirë kundër FK Vardarit.
