Në Kavadar synojmë fitoren e gjashtë radhazi
Pas një serie të shkëlqyer prej pesë fitoresh radhazi, FC Shkupi do të zbresë nesër në fushën e Kavadarit për të zhvilluar ndeshjen e xhiros së 22-të në Ligën e Parë të Maqedonisë së Veriut kundër Tikveshit. Vetëm tre ditë pas fitores bindëse 3-1 ndaj Pelisterit, skuadra jonë do të kërkojë të vazhdojë formën e shkëlqyer, duke marrë tre pikë të tjera në transfertën e vështirë të Kavadarit.
Në këtë moment të sezonit, skuadra është në një ritëm të lartë dhe ka treguar një përmirësim të ndjeshëm në lojë, si në aspektin ofensiv, ashtu edhe në mbrojtje. Fitorja e nesërme do të ishte një hap tjetër i rëndësishëm drejt objektivave të sezonit dhe do të rikonfirmonte Shkupin si një nga ekipet më në formë të kampionatit.
Forma aktuale, renditja dhe statistikat
Shkupi është skuadra e vetme në kampionat që ka fituar pesë ndeshjet e fundit, duke shënuar 11 gola dhe duke pësuar vetëm 3. Aktualisht, ekipi ynë renditet në vendin e gjashtë me 31 pikë dhe synon të vazhdojë ngjitjen në tabelë. Nga ana tjetër, Tikveshi ndodhet në vendin e parafundit me 15 pikë, duke kaluar një sezon të vështirë dhe duke luftuar për mbijetesë.
Një nga faktorët kryesorë të suksesit të skuadrës sonë kohët e fundit ka qenë organizimi më i mirë në fushë, harmonia mes reparteve dhe efikasiteti në fazën sulmuese. Me 33 gola të shënuar deri tani, Shkupi ka sulmin e dytë më të mirë në kampionat, ndërsa Tikveshi ka shënuar vetëm 9 herë në 21 ndeshje, duke pasur sulmin më të dobët të ligës.
Duelet e mëparshme
Historikisht, përballjet mes Shkupit dhe Tikveshit kanë qenë të favorshme për ekipin tonë. Në 13 duelet e fundit mes dy skuadrave, Shkupi ka arritur 7 fitore, 4 barazime dhe vetëm dy humbje.
Në ndeshjen e parë të këtij sezoni, të zhvilluar në stadiumin e Çairit në xhiron e 11-të, Shkupi triumfoi me rezultat 3-1 falë një paraqitjeje dominuese. Florian Kadriu shënoi dy gola në atë takim, ndërsa Emanuel Avornyo realizoi golin tjetër. Për sulmuesin nga Gana, Tikveshi është një kundërshtar i preferuar, pasi deri më tani i ka shënuar 3 gola këtij ekipi, nga gjithsej 6 që ka realizuar në kampionatin tonë.
Situata në skuadër
Për këtë ndeshje, trajneri Alparslan Erdem nuk do të ketë në dispozicion qendërmbrojtësin Esmin Licina, i cili mungon për shkak të pesë kartonëve të verdhë. Megjithatë, pjesa tjetër e skuadrës është e gatshme dhe në formë optimale për të vazhduar serinë e fitoreve.
Një tjetër pikë e fortë për Shkupin është thellësia e skuadrës dhe rotacioni i suksesshëm që ka bërë trajneri në javët e fundit. Lojtarët kanë treguar një nivel të lartë përkushtimi dhe janë të gatshëm të japin gjithçka në fushë për të siguruar një tjetër fitore.
Koha dhe referi i ndeshjes
Dueli i javës së 22 në LPFM mes Tikveshit dhe Shkupit, do të zhvillohet nesër në Kavadar, me fillim në orën 14.00, ndërsa arbitër kryesor i takimit do të jetë Vllatko Ilieski nga Prilepi.
