Skuadra e FC Shkupi po shfrytëzon mini pauzën e kampionatit për tu përgatitur për ndeshjen e javës së 5-të të kampionatit vendor, kur do të jetë mysafire e skuadrës së Vardarit.
Pikërisht nga dita e djeshme, lojtarët dhe stafi i trajnerëve i janë kthyer punës, që në mënyrë sa më të mirë të jenë të gatshëm për derbin e javës së pestë.
Të dielën kryesia e klubit ka organizuar ndeshje miqësore, ku për kundërshtarë do të ketë ekipin e Vëllazërimit nga Kërçova, skuadër kjo që garon në Ligën e Dytë të Maqedonisë.
Në këtë ndeshje trajneri Hajati Sojdash do të ketë mundësi që në ekip të inkuadrojë edhe futbollistë e rinj që sapo janë afruar në skuadër, Viktor Angelov, Onyebuchi Emmanuel Ifeanyi si dhe Erdon Dacin, i cili ende është në pritje nëse UEFA do ti lejojë që të luajë për skuadrën bardh e kaltër.
Ndeshja Shkupi – Vëllazërimi luhet të dielën në stadiumin e Çairit në Shkup, me fillim në orën 17:00.
